HATAW! D'yaryo ng Bayan hatawtabloid.com
KOMPIRMADONG malakas talaga ang tambalang Nash Aguas at Alexa Ilacad, isama pa ang sumisikat na boy group ng ASAP 19 na Gimme 5.
Dahil sa nakaraang Kantar Media weekend ratings ay nanguna ang dalawang episode ng Wansapanataym Presents Perfecto taglay ang national TV rating na 26.4% noong Sabado (Agosto 30) at 27.6% noong Linggo (Agosto 31) na 10 puntos ang lamang sa mga katapat nitong programa sa GMA na Marian (15.9%) at Ismol Family (18%).
Bukod sa TV ratings, wagi rin ang Wansapanataym special nina Nash, Alexa, at Gimme 5 sa social networking sites tulad ng Twitter, na naging worldwide trending topic angWansa Perfecto noong Sabado at Alexa Ilacad Wansa Perfecto naman noong Linggo.
At sa pagpapatuloy ng kuwento ng Wansapanataym Presents Perfecto ngayong weekend (Setyembre 6 at 7), unti-unti nang magbabago ang buhay ni Perry (Nash) dahil matutupad na ang kanyang mga kahilingan sa tulong ng isang mahiwagang nilalang. Magiging perpekto na ba ang buhay ni Perry sa oras na makuha niya ang lahat ng kanyang ninanais?
Kasama sina Matet de Leon, Vandolph Quizon, Candy Pangilinan, at ang mga miyembro ng Gimme 5 na sina John Bermundo, Joaquin Reyes, Brace Arquiza, atGrae Fernandez mula sa panulat ni Joel Mercado at idinirehe ni Onat Diaz.
Handog naman ng Dreamscape Entertainment Television ang original storybook ng batang Pinoy na Wansapanataym ay ang longest-running at most-awarded fantasy-drama anthology ng ABS-CBN.
ni Reggee Bonoan
