Aktor/TV host, inirereklamo dahil sa sobrang epal

INIREREKLAMO ng taga-produksiyon ang kilalang actor/TV host dahil masdyado raw ma-epal at nagdudunong-dunungan.

Ang buong kuwento sa amin, ”masyadong nagmamarunong, siya mismo nagdidirehe ng sarili niya kung ano ang gagawin niya, eh, may direktor naman na nagsasabi kung anong gagawin niya at may floor director na magtuturo sa kanya sa blocking.

“Ayaw niya makinig, ang gusto niya ang masusunod at heto pa, may hawak siyang mikropono para sabihin kung ano ang gagawin niya, nakakabastos, ’di ba?”

Sabi namin na baka naman nagsa-suggest lang ang aktor since solong programa niya ito at gusto niyang mapagbuti.

“Hindi, gusto niya siya mismo magdidirehe sa sarili niya, kung ano ang suggestion niya, kailangang masunod,” katwiran sa amin.

Eh, baka nga type ng aktor na maging direktor ng sariling programa? Baka type na rin niyang siya na rin ang mag-produce? Tutal tumatanggap naman ng blocktimer ang TV network.

ni Reggee Bonoan