PATAY ang isang pulis habang kritikal ang kanyang kinakasama makaraan paulanan ng bala ng dalawang hindi nakilalang armadong lalaki na lulan ng Ford Everest sa Muntinlula City kamakalawa ng gabi.
Binawian ng buhay noon din si SPO3 Rolando Lavarez, 54, nakatalaga sa Police Community Precinct (PCP-3) ng Muntinlupa City Police, residente sa Antonio Compound, Sitio Fantastic, Brgy. Alabang, Muntinlupa City.
Nakaratay at inoobserbahan sa Ospital ng Muntinlupa ang kinakasama niyang si Madonna Belono, 33, ng naturang lugar, tinamaan ng bala sa kaliwang braso, kili-kili at pisngi.
Base sa report na isinumite nina SPO1 Richard Baguyo at SPO1 Eduardo Rodaje kay Muntinlupa City Police chief, Sr. Supt. Allan Nobleza, naganap ang pamamaril sa harapan ng bahay ng mga biktima.
Nakatayo ang dalawa nang sumulpot ang isang sasakyang Ford Everest na hindi naplakahan, saka pinagbabaril ng mga suspek sina Lavarez at Belono. (JAJA GARCIA)
