DEAD-ON-THE-SPOT ang mag-amang sakay ng motorsiklo makaraang pagbabarilin ng dalawang hindi pa nakikilalang mga salarin habang binabagtas ang madilim na bahagi ng Bernardo St., sa Barangay Bonga Menor, Bustos, Bulacan, kamakalawa ng gabi.
Kinilala ng pulisya ang pinaslang na mag-ama na sina Alex Villanueva, 60 anyos at ang anak na si Jervy, 24 anyos, kapwa nakatira sa Bulacan Heights Subdivision, sakop ng Barangay Catacte sa nabanggit na bayan.
Sa ulat ng pulisya, magkaangkas sa motorsiklo ang mag-ama pauwi sa kanilang bahay nang harangin ng dalawang lalaki na bigla silang pinagbabaril dakong 9:30 ng gabi.
Narekober sa pinangyarihan ng krimen ang pitong basyo ng bala ng .9mm caliber pistol na ipinutok sa mag-ama.
Samantala, blanko ang pulisya sa motibo ng pagpaslang sa mag-ama.
(DAISY MEDINA)
