62-anyos kano todas sa Samurai

NAPATAY sa saksak ng isang Samurai ang 62-anyos American national ng isang 29-anyos lalaki sa Makati City kamakalawa ng gabi.

Kinilala ni Makati City police chief Sr. Supt. Manuel Lukban ang biktima na si Robert Trotter ng 2963 General del Pilar St., Brgy. Bangkal.

Namatay noon din si Trotter sanhi ng malalim na saksak ng samurai sa katawan habang arestado ng mga nagrespondeng barangay at alagad ng batas ang suspek na kinilalang si Gerald Gelera ng 5051 Malolos St., Brgy., Olympia, Makati City.

Ayon sa pulisya , dakong 9:00 ng gabi nang mangyari ang insidente sa 4th floor ng isang condo sa Makati city.

Sa pahayag ng saksing si Dennis Ancajas, 24, isang construction worker, nasa ground floor siya nang nakarinig ng sigaw mula sa itaas ng condo kaya dali-dali niyang pinuntahan upang tingnan.

Nang makarating sa lugar, nakita niya ang suspek na sinasaksak ang biktimang si Trotter kaya agad siyang umalis upang humingi ng tulong.

Agad nagresponde ang mga pulis at Barangay kaya nadakip ang suspek na si Gelera.

Nakuha ng pulisya mula sa pag-iingat ng suspek ang 2 tooter, tatlong stick ng marijuana at Samurai.

Patuloy pang inaalam ng pulisya ang dahilan o motibo ng suspek sa pagpaslang sa biktima.

Nakapiit sa Makati city police detention cell ang suspek habang inihahanda ang kasong isasampa laban sa kanya.

ni Jaja Garcia