GENERAL SANTOS CITY – Ikinostudiya ng CSWD at pulisya si Mary Ann Meliton, ang 20-anyos ina ng fetus na itinapon at natagpuan kamakalawa sa damuhang bahagi ng GenSanville Subd., Brgy Bula sa lungsod.
Ito’y nang samahan ng kanyang tiyahin na si Lisa Enriquito ang mga pulis sa kanilang lugar sa J.P. Laurel, Malungon, Sarangani province upang arestohin si Meliton.
Ayon kay Enriquito, naawa siya sa pamangkin at gusto niyang tulungan na harapin ang nagawang kasalanan.
Nananatili pa si Meliton sa General Santos City Hospital dahil sa naranasang panghihina bunsod ng pagpapalaglag.
Pansamantala rin ikinulong ng Bula PNP ang amo niyang si Mary Grace Valera dahil hindi niya agad ini-report ang pagpapalaglag ng nasabing kasambahay, ngunit pinakawalan din ng mga pulis.
Sinasabing nagawa ni Mary Ann ang pagpapa-abort upang maiwasan ang eskandalo dahil hindi ang asawa niya ang ama ng kanyang ipinagbubuntis.
