HATAW! D'yaryo ng Bayan hatawtabloid.com
KULUNGAN ang binaksakan ng 28-anyos babae nang tangkaing ipasok sa loob ng Immigration detention cell sa Camp Bagong Diwa ang noodles na may nakaipit na shabu kamakalawa sa Taguig City.
Sinampahan ng kasong paglabag sa Comprehensive Dangerous Drug Act sa Taguig City Prosecutors Office si Mary Ann De Leon, ng 546 Alonzo St., Malate, Manila na nakompiskahan ng tatlong sachet ng shabu na nagkakahaga ng P30,000 na nakapaloob sa isang Korean noodles.
Sa ulat ni SPO1 Napoleon Tongco, ng Station Anti-Illegal Drugs Special Operation Task Group (SAID-SOTG) ng Taguig police, alas-4:00 ng hapon, sumakay ng taxi na minamaneho ni Percival Guingal si De Leon, kasama ang isang dayuhang Koreano sa Malvar St., Malate Manila at nagpahatid sa Camp Bagong Diwa.
Pagdating sa gate ng Camp Bagong Diwa, bumaba ang dayuhan at inutusan si De Leon na siya ang magbitbit ng noodles sa hindi pa nakikilalang bilanggo na nakapiit sa detention cell ng Bureau of Immigration (BI).
Bago pa makapasok sa detention cell si De Leon, sinuri na nina Rodrigo Oamil Jr. at Francisco Pecaoco, mga confidential agent ng BI, ang noodles at nakita sa loob nito ang tatlong bulto ng shabu.
Inamin ni De Leon na gumagamit siya ng bawal na droga ngunit hindi aniya siya nagbebenta nito.
Patuloy na inaalam ng pulisya ang pagkakakilanlan sa Koreanong kasama ni De Leon upang maisama rin sa demanda.
(JAJA GARCIA)
