Misis, anak, 1 pa minasaker ng garand rifle ni mister (1 sugatan)
KORONADAL CITY – Tatlo ang binawian ng buhay sa nangyaring masaker sa bayan ng T’boli, South Cotabato dakong 10 p.m. kamakalawa ng gabi.
Kinilala ang isa sa napatay na si Alvin Sumili, habang hindi pa nakukuha ang pangalan ng dalawa pang biktima na misis at anak ng suspek na si alyas Jerry Piang, dating bandido.
Sa salaysay ng sugatan na si Johny Sapanta, nilalapatan ng lunas sa South Cotabato Provincial Hospital, pumasok at nag-amok ang suspek na si Piang sa bunkhouse ng mga trabahante ng kompanyang Sumifru sa Brgy. Datal D’lanag, Tboli, South Cotabato at namaril gamit ang Garand rifle.
Hinahanap ng suspek ang kanyang misis na hinihinala niyang may ibang karelasyon. Ngunit nang hindi makita ang kanyang misis ay binaril ang natutulog na si Sumili. Hindi pa nakontento ang suspek at binaril si Sapanta.
Pinaputukan din ng suspek si Michael Abas at ang mga gwardiya ngunit hindi niya tinamaan.
Pagkaraan ay umuwi ng suspek at nadatnan sa bahay ang kanyang misis at anak na kanyang walang awang pinagbabaril.
Kasalukuyang tinutugis ang suspek ng mga awtoridad. (B. JULIAN)
