Sa Daigdig ng mga Engkanto (Part 14)

GINAMIT NG HALIMAW ANG IMAHEN NI ZABRINA PARA SAGPANGIN SI BAKLITA

“‘Lika… Hanapin natin ang Kuya Roby mo at si Zaza,” pagbobuntaryo ni Baklita.

Ginalugad nina Zabrina at Bambi ang maraming lugar sa kabayanan.

“Hayyy! Para tayo nitong naghahanap ng karayom sa ga-bundok na bunton                               ng dayami,” litanya ni Bambi na pakendeng-kendeng sa paglalakad.

“Pahinga muna tayo sandali … Bibili lang ako ng softdrinks, ha?” ang paalam ni Zabrina kay Bambi.

Nagtuloy si Zabrina sa isang convenience store. Nagpahangin-hangin naman si Bambi sa kalapit na parke.

Binalikan si Bambi ni Zabrina at binigyan ng malamig na inumin. At pagkaraan niyon ay naghawak-kamay ang dalawa sa paglalakad upang muling hanapin sina Roby at Zaza.

“Ano ka ba, girl? Bilis-bilisan mo naman ang lakad,” angal ni Bambi na hila-hila sa kamay ang kasama.

Pero gayon na lamang ang panghihilakbot ni Baklita nang mapansin ang mabalahibong kamay ng akay niya: ang huwad na Zabrina na tumutulo ang laway at litaw ang matutulis na ngipin. At kisap-mata lang ay sakmal na ito sa leeg ng impakto.

Bangkay na si Bambi nang matagpuan ng tunay na Zabrina. Pero naroroon pa rin ang impakto na lumapa sa katawan ng baklitang biktima. Na walang abog na sumalakay sa dalaga. Umalingangaw ang malakas na pagtili nito makaraang sambitin ang mga katagang “Diyos ko po!”

Parang malakas na bugso ng hangin na dumating ang tagapagligtas ni Zabrina.

“J-Jonas!” bulalas ng dalaga.

Humarang ang lalaking kamukha ni Jonas sa daraanan ng impakto. Sa pandinig ni Zabrina ay parehong umuungol-ungol ang dalawa. Mandi’y nag-uusap o nagpapaliwanagan sa isa’t isa.

Tiyempo iyon sa pagdating ng balut vendor na isinisigaw ang dalang paninda.

“Baluuuut!” (Itutuloy)

ni rey Atalia