Konsehal, dyowa timbog sa baril, droga

SWAK sa kulungan ang isang municipal councilor gayundin ang kanyang asawa makaraan salakayin ng Philippine Drug Enforcement Agency (PDEA) ang kanilang bahay sa lalawigan ng Maguindanao.

Kinilala ni PDEA Undersecretary Arturo Cacdac, Jr., ang mga suspek na sina Nasser Macarangcat Buat, 40, municipal councilor, at Tarhata, 40, kapwa residente ng Sitio Marantao, Bugasan Norte, Matanog, sa lalawigan.

Sa bisa ng search warrant na ipinalabas ni Executive Judge, 12th Judicial Region, Regional Trial Court (RTC) Branch 13, Hon. Bansawan Ibrahim Al Haj, hinalughog ng PDEA ang bahay ng mag-asawa at narekober ang 47 sachet ng shabu at drug paraphernalia.

Bukod dito, nakita rin sa bahay ng dalawa ang M16A1 Elisco rifle, M16 armalite, cal. 45 Norinco pistol, cal. 45 Armscor at iba’t ibang uri ng mga bala na pawang walang kaukulang papeles.

(JETHRO SINOCRUZ)