HATAW! D'yaryo ng Bayan hatawtabloid.com
Maricris Valdez Nicasio
NAKALULUNGKOT na ikinasal na si Isabelle (Kim Chiu) kay Franco (Jake Cuenca) noong Biyernes ng gabi. Samantalang bugbog sarado naman si Samuel (Coco Martin) dahil sa paghihiwalay sa kanila ng babaeng pinakamamahal niya at pagpigil sa kanilang pagpapakasal sana.
Ramdam na ramdam tiyak ng mga sumusubaybay sa Ikaw Lamang ang lungkot at hinagpis ni Isabelle habang ikinakasal kay Franco. Dapat nga naman ay ang pagpapakasal ang isa sa pinakamaliligayang araw ng isang babae subalit iyon ay tila pagluluksa kay Isabel dahil habambuhay na siyang mawawalay sa kanyang minamahal.
Si Samuel, bagamat ‘di na makatayo ay isinisigaw pa rin ang labis na pagmamahal kay Isabelle. ‘Yun bang pasa-pasa na ang buong katawan niya’y si Isabel pa rin ang iniisip niya.
Sobrang makabagbag damdamin naman ang pagtatagpo nina Samuel at kanyang inang si Elena (Cherry Pie Picache). Iba talaga ang dating kapag magagaling na actor ang nagsisiganap. Ibang klase ang kanilang pag-arte na sumusuot sa kaibuturan ng puso na tiyak na ramdan ng mga manonood.
Ang tagpong iyon ay isa sa masasabing best scene ni Coco sa Ikaw Lamang.
Samantala, bukod sa pangyayari noong Biyernes, pinakatinutukan at pinaka-pinag-usapan ng buong sambayanan ang The Wedding episode ng master teleserye ng ABS-CBN na naudlot ang pag-iisang dibdib nina Samuel at Isabelle. Patunay dito ang datos mula sa Kantar Media noong Huwebes (Mayo 1)na nanguna ang Ikaw Lamang taglay ang national TV ratings na 29.7%, o halos 14 puntos na kalamangan kompara sa katapat nitong programa sa GMA na Carmela (16.1%).
Dahil sa mga makapigil-hiningang tagpo ng The Wedding episode, mabilis na naging nationwide trending topics sa sikat na microblogging site na Twitter ang hashtag na#IkawLamangTilDeathDoUsPart at maging ang mga pangalan ng mga karakter na sina Samuel, Isabelle, Franco, at Gonzalo (John Estrada).
Tutok lang sa Ikaw Lamang para malaman kung paano haharapin ni Isabelle ang bagong yugto ng kanyang buhay lalo na kapag nalaman niya ang sinapit ng iniibig na si Samuel? Isusuko na ba ni Samuel ang pag-iibigan nila ni Isabelle ngayong asawa na nito si Franco?
