Ginang dedbol sa ratrat

DEDBOL ang isang ginang makaraang pagbabarilin sa Quezon City, nitong Linggo ng umaga.

Patay noon din sa harap ng isang sari-sari store ang biktimang si Aurora Ramos-Lumahan, 48-anyos, sanhi ng tama ng bala ng kalibre .45 ba-ril sa ulo.

Ayon sa isang Rolando Paraiso, may-ari ng tindahan, narinig niya nang kumatok ang biktima habang sila’y nano-nood ng TV sa loob ng tindahan kasunod ng putok ng baril.

Sa  imbestigasyon ng Scene of the Crime Operatives (SOCO), tumagos ang isang bala na tumama  sa noo ng biktima, ang pangalawa nama’y sa tapat ng kanyang ilong.

Nabatid na mayroon walong anak ang biktima at tatlo sa kanila ay may sariling pamilya habang nasa kanyang poder ang limang iba pa.

Inaalala ng mga kaanak ng biktima kung sinong mag-aalaga sa mga anak  ni Lumahan na nitong Huwebes lang, nakulong ang kanilang ama nang mahulihan ng bala ng baril bukod sa isinasangkot din sa ilegal na droga.