ni Maricris Valdez Nicasio
[divider]
NOON pa ma’y nababalita nang madalas maglaro ng sugal o mag-casino si Willie Revillame sa Solaire Resort and Casino. Mayroon daw private room ang TV host sa nasabing casino.
Pero, recently, narinig naman nating lumipat na ng laruan si Willie. Mula sa Solaire ay sa Resorts World naman daw ito naglalagi. Sinasabing marami ang nakakakita sa TV host na sa 3rd floor ng Resorts World sa isang VIP room umano iyon naglalaro.
Ayon pa sa nagtsika ng balitang ito, mahina raw ang P50-M na patalo umano ni Willie gabi-gabi. Totoo kaya ito?
Sana naman ay hindi, dahil baka maubos ang ipinundar ni Willie kung lagi lang natatalo sa sugal. Sayang naman ang sobrang pagsisipag niya para marating ang kasalukuyang kinalalagyan.
Hindi naman masama ang magliwaliw, ‘wag lang ‘yung sobra, ‘ika nga. Minsan nang itinanggi ni Willie ang balitang naghihirap na siya dahil sa pagsusugal. May itinatayo pa nga siyang hotel sa Tagaytay at nasabi nitong may mga kausap siyang gustong sumosyo sa kanya para itayo ang Marriot Hotel katabi ng Wil Tower and Residences Mall sa Quezon City.
Bukas ang aming pahina para sa anumang masasabi ni Willie ukol sa balitang ito.
