Pinay, Chinese dinukot sa Sabah

SABAH – Patuloy ang imbestigasyon ng mga awtoridad sa nangyaring pagdukot sa Filipina at Chinese national sa isang floating resort sa Semporna, isla ng Sabah.

Sa ulat ng Malaysian media, tinukoy ang report ni Eastern Sabah Security Command (ESSCOM) director general Datuk Mohammad Mentek na nangyari ang insidente bandang 10:30 p.m. kamakalawa.

Sinasabing nagtatrabaho sa resort ang nabanggit na Filipina.

Batay sa inisyal na imbestigasyon, lulan ng motorized banca ang mga suspek nang pasukin nila ang Singamata Reef Resort at pwersahang dinukot ang mga biktima.

Magugunitang noong nakaraang taon, sinalakay din ng armadong grupo ang Pom-Pom island malapit sa Semporna, na ikinamatay  ng isang Taiwanese national.

PAGDUKOT KINOMPIRMA NG DFA

KINOMPIRMA ng Department of Foreign Affairs (DFA) kahapon ang nangyaring pagdukot sa Filipina at babaeng Chinese national habang nasa Singamata beach resort sa Semporna town sa Sabah, Malaysia.

Sinabi ni DFA Spokesperson Assistant Sec. Charles Jose, dakong 10:30 p.m. kamakalawa, nakatanggap ng report ang Embahada ng Filipinas sa Kuala Lumpur na may dinukot na Filipina at Chinese sa naturang resort.

Agad aniyang nagresponde ang Philippine Police Authorities na may hurisdiksyon sa lugar ngunit ‘di na nila naabutan ang mga suspek.

ni JAJA GARCIA