HATAW! D'yaryo ng Bayan hatawtabloid.com
ni Maricris Valdez Nicasio
PURING-PURI ni Pokwang ang pagiging hard working ni Julia Barretto. Kasama si Pokwang sa launching fantaserye ni Julia, ang Mira Bella na mapapanood na ngayong hapon sa ABS-CBN2.Ayon kay Pokwang, ”si Julia, napakasipag na bata at nakikita namin na willing siyang matuto. Sinabi nga niya na hindi siya kasing-perfect na artista na tulad ng mga tiyahin niya. Pero nakikita namin sa kanya na nagpupursige talaga siya and she’s willing to learn more.”
Excited din ang magaling na komedyana dahil kasama siya sa Mira Bella. Matagal-tagal na rin kasi ang unang ginawa ni Pokwang na fantasy series, ang Aryana ni Ella Cruz na gumanap din siyang ina ng batang aktres. Sa Mira Bella, siya rin ang gaganap na ina ni Julia.
Samantala, inamin ni Pokwang na hindi pa siya handang pumasok sa isang seryosong relasyon dahil sa naging palpak niyang relasyon noon. Kaya naman ang kanyang anak na lamang ang kanyang prioridad sa kasalukuyan. Kumbaga, work na lang siya ng work para mapatapos ang anak.
Sa kabilang banda, iinog ang kuwento ng Mira Bella sa buhay ni Mira (Julia), ang dalagitang nagmana ng sumpa na magkaroon ng balat na tulad ng isang kahoy.
Sa kabila ng panghuhusga at pang-aalipusta ng karamihan, naniniwala pa rin si Mira sa likas na kabutihan ng tao dahil sa ipinadarama sa kanyang pagmamahal ng mga umampon sa kanya na sina Osang (Pokwang) at Paeng (John ‘Sweet’ Lapus).
