13-anyos tostado sa kidlat (4 sugatan)
NATUSTA ang 13-anyos binatilyo habang sugatan ang apat mangingisda nang tamaan ng kidlat kamakalawa sa Camarines Sur.
Dinala na sa punerarya ang bangkay ng biktimang si Christian Erez, habang ginagamot sa Partido District Hospital sanhi ng 2nd degree burns sa katawan ang iba pang mga biktimang sina Jeantly Buhayo, 32; Ronald Barcites, 41; John Paul Nabus, at Jimboy Buhayo, 29, pawang mga residente ng Brgy. Cabotoran sa nasabing bayan.
Batay sa ulat na nakarating sa Police Regional Office (PRO) 5 sa Camp Simeon Ola, naganap ang insidente dakong 4 a.m. habang nasa laot ang mga biktima at nangingisda sa kabila ng sama ng panahon.
Ilang beses munang kumidlat sa kinalulugaran ng mga biktima at minalas na tumama ang huling kidlat sa kanilang bangka.
(JETHRO SINOCRUZ)
