HATAW! D'yaryo ng Bayan hatawtabloid.com
Patay ang isang karnaper at agaw-buhay ang kanayng kasama makaraan makipagbarilan sa mga operatiba ng MPD-ANCAR sa Taft Ave. kanto ng Quirino Ave, Malate, Manila. Naka-inset ang inagaw na motorsiklo ng mga suspek. (ALEX MENDOZA)
Isa ang patay habang dalawa ang sugatan sa naganap na enkwentro ng mga pulis laban sa mga hinihinalang carnapper sa Maynila, iniulat kahapon.
Sa panayam sa biktimang tumangging magpabanggit ng pangalan, pauwi na siya galing trabaho mula sa isang restaurant sakay ng motorsiklo nang maganap ang insidente.
Pagdating niya sa kanto ng Quirino at Taft Avenue, hinarang siya ng tatlong lalaking sakay ng dalawang motorsiklo at tinutukan ng baril habang pilit na inaagaw ang kanyang motor.
Nagpumiglas ang biktima at pinatakbo nang mabilis ang sasakyan upang humingi ng tulong sa pulis na nakaposte sa lugar.
Nang makarating sa Remedios St. checkpoint, pinahinto ng mga pulis ang mga suspek pero humarurot ng takbo at doon nagsimula ang putukan.
Nasugatan sa enkwentro ang dalawa pang suspek na bantay-sarado ng pulisya habang nagpapagaling sa ospital.
