Vhong niresbakan si Cabañero
TULUYAN nang naghain ng kasong perjury ang TV host/actor na si Ferdinand “Vhong” Navarro laban sa aspiring beauty queen na si Roxanne Cabañero.
Dakong hapon kahapon nang magtungo sa Pasig Prosecutor’s Office si Navarro.
Ayon sa legal counsel niyang si Atty. Alma Mallonga, kung may sapat na oras pa ay magsasampa rin sila ng parehong reklamo sa Manila Prosecutor’s Office.
Kung maaalala, inaakusahan ni Cabañero ang 37-year-old actor na aniya’y bumaboy sa kanya noong taon 2010 ngunit ngayon lang nagkalakas ng loob lumantad at naging inspirasyon daw si Deniece Cornejo.
Una nang nanindigan ang kampo ni Roxanne na may basehan ang kanilang kasong isinampa laban sa TV host, sa kabila ng pabago-bagong pahayag kung kailan nangyari ang sinasabi ng panggagahasa.
