P1.5-M cash, alahas tinangay ng sekyu, kasambahay
NAHAHARAP sa kasong qualified theft ang kasambahay at security guard makaraang magsabwatan sa pagtangay ng pera at alahas ng kanilang amo kamakalawa ng gabi sa Antipolo.
Kinilala ni Senior Inspector Perlito Tuayon, PCP-1 commander, ang nadakip na mga suspek na sina Huevi Ginang y Vintulero, 25, kasambahay, at Danilo Arcamao, 37, security guard ng Francisville, Subd., Brgy. Mambugan sa lungsod.
Pormal silang kinasuhan ng kanilang amo na si Anne Michele Torio, nasa hustong gulang, at nakatira sa nabanggit na lugar.
Ayon sa imbestigasyon ni PO3 Robert Gangan, dakong 7 p.m. habang wala sa bahay si Torio, inilabas ng mga suspek ang safety vault na naglalaman ng pera at iba’t ibang uri ng mga alahas na nagkakahalaga ng P1.5 milyon.
Sa follow-up operation ng pulisya, agad nadakip ang mga suspek at nabawi ang kanilang mga nakulimbat.
(ED MORENO)
