Pugante patay sa shootout (3 pa arestado)
AGAD namatay ang takas na bilanggo makaraan makipagpalitan ng putok sa mga awtoridad na aaresto sa kanya sa Road 1, Brgy. Minuyan 2, sa Lungsod ng San Jose del Monte, Bulacan.
Sa ulat na nakarating sa tanggapan ni Bulacan PNP Director, Senior Supt. Joel Orduna, kinilala ang napatay na si Russel Arceo, 31, residente ng #561 Villa Angelina Subd., Sto. Domingo 2, Capaz, Tarlac
Habang nasa kustodiya ng pulisya ang tatlong kalalakihan na nahaharap sa kasong kriminal matapos makompiskahan ng armas at bala, na sina Arjay de Belen, 18, construction worker; Tristan Huit, 30, computer technician, at Jose Paulo Maesa, 23, pawang residente ng Brgy. Minuyan 4, City of SJDM, Bulacan.
Ayon sa nakatalang ulat, dakong 4:30 a.m. nang salakayin ng pulisya ang safehouse ng nasabing pugante.
Ngunit imbes sumuko nang mapayapa ay nakipag-barilan sa mga awtoridad na humantong sa kanyang kamatayan.
Ayon pa sa ulat, si Arceo ay nakatakas noong Agosto 28, 2012, matapos dumalo sa pagdinig ng kanyang kaso sa droga sa RTC, Branch 19 sa Malolos City.
(DAISY MEDINA)
