Biktima ng ligaw na bala, 28 na
UMAKYAT na sa 28 biktima ang tinamaan ng ligaw na bala, simula noong Disyembre 16.
Sa pinakahuling tala ng PNP, anim pa ang nadagdag sa listahan ng mga biktima ng stray bullet noong bisperas ng Bagong Taon.
Ayon kay PNP Spokesman, Senior Supt. Wilben mayor, dalawa sa anim na biktima ay kapwa dalawang taon gulang.
Kinilala ang mga biktimang sina Margaret Diane Vocal mula sa Pasig City, at Jared Stephan Bitacora mula Digos City, Davao Del Sur.
Tinamaan ng bala si Vocal sa noo habang si bitacora ay sa kaliwang kamay.
Ilang oras naman bago ang bagong taon ay tinamaan ng ligaw na bala sa ulo ang tatlong buwan gulang na si Von Alexander Llagas habang natutulog sa kanilang bahay sa Ilocos Sur.
Si Llagas ang nag-iisang namatay mula sa 28 biktimang tinamaan ng ligaw na bala.
(DANG GARCIA)
