Kahera ng hotel nalansi ng holdaper
HINDI pinansin ng isang lalaki ang nakatutok na CCTV camera nang holdapin nito ang kahera ng sangay ng Sogo Hotel, sa Pasay City nitong Sabado.
Sa pahayag ng kaherang si Jeanefe Palicpic, 30, ng Zone 4, Fort Bonifacio, pasado alas 5:00 ng hapon pumasok umano sa kanilang establisyemento sa L. Wood St., Pasay, ang suspek na nagpanggap na customer, umupo sa silya sa lobby at sinabing hinihintay lamang niya ang kanyang kasama.
Makalipas ang ilang sandali, lumapit ang suspek sa kahera, bumunot ng baril at nagdeklara ng holdap sabay bukas sa kaha at tinangay ang mahigit P18,000 na kita ng hotel bago tumakas patungong EDSA.
Sa ginawang pagrerebisa ni PO3 Gionvanni Arcinue ng Station Investigation and Detective Management Section (SIDMS) ng Pasay police, kinilala ang suspek na si Billy Joseph Miranda, 25, ng 502 F. Cruz St., Malibay.
Ipinakita ni Arcinue kay Palicpic ang larawan ng mga nahuli na nilang holdaper at positibong kinilala ng kahera si Miranda na siyang nangholdap.
Agad pinuntahan ng mga pulis sa ibinigay na address ang suspek ngunit bigong maaresto si Miranda. (JAJA GARCIA)
