Misis nadale ng salisi

bagamat makalumang estilo ang pamamaraan ng hinihinalang miyembro ng ‘salisi gang’ matagumpay niyang natangay ang gadgets, pera at alahas kamakalawa ng hapon sa Pasig City.

Nanlulumong dumulog sa tanggapan ni Insp. Glenn Magsino, ng Criminal Investigation Section ng Pasig City Police, ang biktimang si Cerila Octaviano, 46-anyos, residente ng Saint Michael cor. Saint Joseph Sts., SPS Subdivision, Brgy. Rosario ng lungsod.

Ayon sa ginang dakong 1:00 ng hapon nang dumating sa kanyang bahay ang suspek na inilarawan niyang may taas na 5’2″, payat ang pangangatawan.

Nagpakilala umano ang suspek na kaibigan ng kanyang pamangkin na si  Gardner Gracilla, kayat kanyang pinatuloy at sinabing hintayin na lamang ang pag-uwi ni Gardner.

Makalipas ang ilang sandali, nagsabi ang suspek sa ginang na nagugutom dahilan para lumabas ng bahay at bumili ng makakain para sa bisita.

Pabalik na ang ginang sa kanyang bahay, nasalubong niya ang suspek at sinabihan siya na ililipat lamang ang kotse sa tapat ng kanilang apartment.

Ngunit ilang minuto ang nakalipas, hindi na bumalik ang suspek at dito napuna ng ginang na bukas ang pintuan ng kanyang kuwarto at nang kanyang silipin ay wala na ang kanyang mga gadget at alahas.

(MIKKO BAYLON)