HATAW! D'yaryo ng Bayan hatawtabloid.com
BINAN CITY, Laguna – Patay ang tatlong barangay official, na kinabibilangan ng dalawang incumbent barangay councilor, habang sugatan ang isang tanod matapos pagbabarilin ng apat armadong kalalakihan ang barangay hall sa Brgy. Mamplasan sa nasabing lungsod.
Sa ulat ni Supt. Simnar Gran kay Laguna Police Prov. Director, Senior Supt. Pascual Munoz, Jr., kinilala ang mga napatay na sina Edwin Salosa, Ogie Villavicencio, kapwa barangay kagawad, at tanod na si Arnaldo Salosa, pawang tinamaan ng bala sa ulo at katawan.
Nilalapatan naman ng lunas sa pagamutan ang tanod na si Cristobal Sorilla.
Sa inisyal na ulat, dakong 9:30 p.m. habang nag-uusap sa lobby si Brgy. Chairman Rommel Dicdican at kanyang misis, isa sa mga suspek ang biglang pinagbabaril ang barangay hall.
Mabilis na nakatakbo si Dicdican at ang kanyang misis habang nakipagpalitan ng putok si Edwin Salosa ngunit pinaputukan din siya ng mga salarin.
Pagkaraan ay mabilis na tumakas ang mga suspek lulan ng get away vehicle patungong South Luzon Expressway.
Pinag-aaralan na ng pulisya ang footage ng CCTV na nakakabit sa barangay hall upang makilala ang mga salarin.
Iniimbestigahan din ng pulisya kung ano ang motibo sa krimen.
(BOY PALATINO)
