Kotse ng slain ad exec narekober sa Las Piñas
NATAGPUAN na ang sasakyan ni Kristelle “Kae” Davantes, ang pinaslang na advertising executive kamakailan.
Ayon kay Philippine National Police (PNP) spokesperson, Senior Supt. Reuben Theodore Sindac, nakita ang Toyota Altis ng biktima sa Camella Homes 4 sa Las Piñas kahapon ng umaga.
Bagama’t tumanggi munang magbigay ng karagdagang detalye, malaking development aniya ito para sa paghahanap ng hustisya sa kaso ng pagpatay kay Devantes, 25-anyos.
Kung maaalala, Setyembre 7 nang matagpuan ang duguang bangkay ni Devantes na tadtad ng saksak, nakatali ang kamay at paa at may takip ang bibig, sa Tibagan Bridge sa Silang, Cavite.
Una nang naglaan ng P200,000 reward ang pulisya para sa sino mang makapagbibigay ng impormasyon para sa ikaaaresto ng suspek sa Davantes killing.
Huling nakitang buhay ang biktima sa Bonifacio Global City matapos gumimik kasama ang mga kaibigan at natagpuang patay kinabukasan.
Inihatid na sa huling hantungan kahapon si Devantes sa Sucat, Parañaque. (JAJA GARCIA)
