GF nabuntis binatilyo nagbigti

NAGA CITY – Nagbigti ang isang 17 anyos high school student ng Calabangan National High School nang mabuntis ang menor de edad din niyang kasintahan.

Natagpuan ng kanyang ama dakong 10 p.m. kamakalawa ang biktimang si Jeric Miguel Desobelle, 3rd year high school, habang nakabigti sa puno ng mangga sa likod ng kanilang bahay sa San Roque, Calabanga, Camarines Sur. Ginamit ng biktima sa pagbigti ang sintas ng sapatos.

Bago ang insidente, problemado ang biktima kung ano ang gagawin nang mabatid na nabuntis niya ang kanyang kasintahan.

Ayon kay PO2 Mark España, hindi matanggap ng pamilya ng babae ang pangyayari at hindi rin boto ang pamilya ng dalagita sa binatilyo.

Napagsabihan din siya ng kanyang ama na labis na ikinasama ng loob ng binatilyo.

Matapos magsimba kamakalawa ay naging balisa na ang biktima hanggang sa matagpuang nakabigti na sa puno ng mangga. (BETH JULIAN)