VP Jejomar Binay kinakalambre na kay Sen. Grace Poe?!

MUKHANG may dahilan na talaga para nerbiyosin si Vice President Jejomar “Jojo” Binay sa ‘pulot’ na si Senator Grace Poe.

Sa pinakahuling survey na ginawa ng Social Weather Station (SWS) may petsang Marso 4-7, 2016, nalamangan ng Senadora ang bise presidente ng tatlong (3) porsiyento.

Nakakuha si Sen. Poe ng 27% habang 24% naman si VP Binay. Nakasunod sa kanila si Roxas sa 22% at 21% si Duterte. Nasa huli sa 4% si Sen. Miriam.

Kung tutuusin, napakababa na ng nakuhang rating ni VP Binay.

Noong una kasing magdeklara si VP Binay na tatakbo siyang presidente, halos 70% ang nakukuha niyang approval ratings.

Kaya itong 24% na ito ay nakanenerbiyos na kung babagsak pa.

Totoong mas organisado ang organisasyon ni UNA VP Binay kay Sen. Grace, pero sabi nga, lumilikha ng bandwagon ang popularidad ng babaeng senador.

Ang bandwagon ay espontanyo. Ibig sabihin natural na clamor mula sa mamamayan.

Mukhang nakadagdag nang husto sa popularidad ni Poe ang desisyon ng Korte Suprema, ‘di ba?

Ang kuwestiyon lang dito, botante bang lahat ang lumilikha ng bandwagon ni Sen. Grace?!

Kaya malinaw na ang magiging labanan ngayon ay organisadong puwersa laban sa espontanyong puwersa equals rehistradong boto.

Sa susunod na buwan, alam nating mas magiging maigting ang kampanya ng bawat kampo dahil malapit na malapit na ang araw ng paghuhukom.

Hahatulan na ng mga botante ang mga kandidatong nanunuyo, nambobola, nananakot at namamakyaw ng boto.

Kung ano man ang kahinatnan ng laban nina VP Binay at Sen. Grace — bayang botante lamang ang nakaaalam.

At ‘yan ang ating babantayan.

Para sa mga reaksiyon, suhestiyon, reklamo at sumbong, magtext sa 0926.899.91.27 o mag-email sa [email protected]. Para sa mga nakaraang isyu ng BULABUGIN please visit https://hatawtabloid.com