Zsa Zsa, may trauma na raw sa paghahanda ng kasal

SA presscon ng The Story of Us noong Martes sa ABS-CBN nakausap si Miss Zsa Zsa Padilla tungkol sa nalalapit nitong kasal sa kanyang architect boyfriend na si Conrad Onglao.

Nabanggit kasing sinundan siya noong nagte-taping sila ng The Story of Us sa New York City, USA.

Ipinagmamalaking ikinuwento rin nina Kim Chiu at Xian Lim na si Zsa Zsa raw ang naging tagaluto ng pagkain nila at naglilinis sa inupahan nilang bahay.

Natatawa naman ang Divine Diva tungkol dito at ang katwiran niya kaya raw niya ginagawa lahat iyon ay para mawala ang boredom niya.

Gong back sa isyung kasal ay hindi itinanggi ni Zsa Zsa na may plano na nga sila ngayong taon pero ayaw niyang i-reveal kung kailan at saan.

“This year, pero surprise. Pati sa kanya (fiancé) surprise. Sabi ko, akong bahala,” kaswal na sabi ng singer/actress.

Bilang lang daw sa daliri ang mga imbitado sa kasal nina Zsa Zsa at Conrad.

“Napakasimple lang naman talaga ng gagawin namin, eh. Ang gusto ko lang, talagang present ‘yung mga anak namin,” katwiran ng aktres.

Parang hindi nakitaan ng excitement sa nalalapit na kasal si Zsa Zsa.

“Kasi hindi sa edad ko talaga, hindi na. Nape-pressure ako na may masaktan, meaning walang maimbita.

“And I don’t want it to be big. Kasi sabi ko, hindi ko naman ito first wedding.

“Mayroon pa akong naudlot na wedding, na-trauma ako, eh.

“Kapag nagpaplano ako, natu-trauma ako, eh, parang nane-nega na ako na hindi matuloy, baka may mangyari. Sabi ko, siguro kung bibiglain ko na lang. Pati siya mabibigla na lang,” pangangatwiran ulit ng aktres.

Si Zsa Zsa ang biological mom ni Kim sa istorya bilang si Tin sa The Story of Usat nagkita sila sa New York.

( Reggee Bonoan )