Maja, may laging ka-text na nagpapasaya ng mundo niya

SA nakaraang Majasty Concert presscon ni Maja Salvador noong Huwebes ay nabanggit ng aktres na may ka-text siya parati at ayaw niyang banggitin kung sino. Kaya ang hula ng lahat ay baka si Coco Martin na leading man niya sa Ang Probinsiyano lalo’t nabanggit pa ng aktres na super close sila ng aktor dahil lagi niyang pinatatawa ito.

Pero itinanggi iyon ni direk Malu Sevilla nang makasalubong namin sa hallway ng ELJ Building pagkatapos ng Majasty presscon.

“Kulitan sila, tawanan kapag hindi kami nagro-roll, masaya kasi sa set namin, lahat kami, masaya. Magkakaibigan kasi silang lahat, close kumbaga,” paglalarawan ni direk Malu sa samahan nina Coco at Maja.

Dagdag pa, “wala talaga kasi si Coco, puro trabaho ‘yan, hindi mo nakikitaan ng iba, seryoso ‘yan sa trabaho. Wala namang kilig akong nakikita kasi si Coco focus ‘yan sa trabao niya,” sabi pa ng direktor.

Hindi lang daw sa tapings nakakasama ni direk Malu si Coco, “kapag hindi kami nagte-taping, magkakasama pa rin kami ni Coco like may pre-prod, at saka si Coco, hindi yata natutulog, kasi bukod sa ‘Probinsiyano’, nagso-shooting pa sila ni Vice (Ganda) para sa MMFF nila, so technically, walang oras ‘yan, kung mayroon man, ipapahinga na lang niya.

“Minsan nga, dalawang oras lang na tulog, okay na siya, pinagsasabihan ko nga, ‘Coco, matulog ka nga’, sagot ba naman sa akin, ‘sayang ang oras direk, itatrabaho ko na lang.’ ‘Di ba, matanda mag-isip, ganoon siya kaya feeling ko walang lovelife talaga si Coco,”pahayag pa ni direk Malu.

Binati namin ang direktor ng Ang Probinsiyano dahil consistent ratings ng Ang Probinsiyano na paganda ng paganda habang tumatagal. “Ay sobrang salamat nga talaga sa lahat ng suporta at sa mga nanonood gabi-gabi, grabe kung alam n’yo lang kung anong hirap namin, sobra as in,” umiiling na sabi pa ng direktor.

 

FACT SHEET – Reggee Bonoan