Panaginip mo, Interpret ko: Pinansin ng crush sa dream

Gud pm Señor H,

Ako si Sarah, paki-interpret naman po ‘yung panaginip ko. Nilapitan daw ako ng crush ko 4 na taon ko na siyang gusto, tapos sinabihan niya raw ako na mahal niya ako at naging kame sa panaginip ko! Pero sa personal, di kame nangingitian at di rin kame nag-uusap. Ano po ba ang ibig sabihin nun? Hintayin ko po ito sa Hataw and pls. don’t post my number. Thanks and God bless

To Sarah,

Maaaring ang bungang-tulog mo ay nagpapakita ng literal na repleksiyon ng iyong atraksiyon sa taong crush mo. Normal lang ang ganitong bagay na mapanaginipan ang iyong crush, dahil kung laging laman siya ng iyong isipan, natural na napakalaki ng posibilidad na mapanaginipan mo siya. Ito ay maaaring paalala rin sa iyo na ngayon na ang tamang panahon upang ipaalam mo ang iyong pagkakagusto sa kanya, lalo na kung sa panaginip mo ay maganda ang nakikita mo o maayos ang tema nito. Kahit sabihing babae ka, maaari mo namang iparamdam ito sa paraang hindi bulgar at hindi ka magmumukhang cheap. Pero ang mahalaga, malaman mo ang nararamdaman din sa iyo ng crush mo, para kung ikaw man ay gusto rin niya o hindi, at least ay makakapag-move-on ka na at hindi na mauubos ang oras mo ng kaiisip sa kanya at kung ano ang feelings niya talaga sa iyo.

Kapag nanaginip na may nagsabi sa iyong ‘Mahal Kita’ o ‘I Love You,’ ito ay nagsasaad na handa ka nang magmahal o gusto mong magbigay ng pagmamahal. Ngunit kung first time mong papasok sa ganitong relasyon, mas mabuting huwag magpadalos-dalos sa bawat mahalagang desisyong gagawin.

Señor H.