HATAW! D'yaryo ng Bayan hatawtabloid.com
HANGGANG ngayon ay marami pa rin ang ‘di makapaniwala na patay na ang guwapo, hunk, at very talented member ng Masculados Dos na si Ozu Ong. Kinarnap ang kanyang kotse at sakay siya pinatay dahil nanlaban daw.
Napakabilis ng pangyayari samantalang few days back ay nakita ko pa ang masayang si Ozu at ang mga kasama niyang Masculados sa Bohol kasama ang manager nilang si Direk Maryo J. delos Reyes.
Lingid sa kaalaman ng marami, si Ozu ay may girlfriend, si Camay Cojuangco ng Baywalk Bodies pero never naming isinulat ang kanilang relasyon dahil baka makasira sa kanilang career at sa pakiusap na rin ni Camay na close sa inyong lingkod.
May anak sila, dalawa.
Nang mabuwag ang Baywalk Bodies ay napunta naman si Camay sa grupong Batchmates bilang si Vasia San Luis.
Ngayong wala na si Ozu, siguro panahon na para malaman ng publiko na may isang taong labis namimighati at nangungulila sa kanya, si Camay aka Vasia.
Nasambit ni Camay aka Vasia sa kanyang FB Page na, ”Alam ko, gustong gusto mo ng nakakabasa ng tungkol sa ‘yo d2 sa facebook ko.
“Heart, nag iisa ka sa buhay ko at habambuhay kitang mamahalin. Sobra kitang mahal, mahal na mahal na mahal na mahal, hintayin mo ko ha. magkikita rin tayo. wag ka hihiwalay sakin. nag iisa ka sa buhay ko. Marcelo Ong a.k.a Ozu Ong till we meet again. Gusto ko, yakapin mo akoaraw araw minuminuto. till we meet again Heart.”
Heart pala ang tawagan nina Camay at Ozu.
Napakabata pa ni Ozu para iwanan ang kanyang mag-iina. Marami pa sanang magagandang opportunity na darating sa kanyang buhay, sa career ng Masculados.
Justice for Ozu Ong ang isinisigaw ng Netizens ngayon.
Ngunit ang tanong, may nakasaksi ba sa nangyari?
At kung mayroon man, may sapat ba itong tapang para isiwalat ang lahat gayung isang sindikato ang kanyang makakalaban?
Grabe na talaga ang kasamaan ngayon sa mundo.
Hindi naman pinulot lang sa kalsada ni Ozu ang pera na ipinambili ng kotse. Ilang taon niya itong pinag-ipunan, ilang shows ang kanyang binuno bago makuha ang dream car na iyon.
Okey lang sana kung kotse lang ang tinangay, pinatay pa siya.
Kay Camay, magpakatatag ka, ipasa-Diyos mo na lang ang lahat. Hindi natutulog ang Diyos at marami pa rin ang naniniwala sa hustisya.
Narito ang larawan nina Ozu at Camay habang lulan ng isang bus nang magbakasyon sila kamakailan sa Ilocos.
MAKATAS – Timmy Basil
