Liver Marin vs Hapee

ni Sabrina Pascua

INAASAHANG ibubunton ng Hapee Toothpaste ang sama ng loob nito sa ATC Liver Marin sa kanilang duwelo sa 2015 PBA D-League Foundation Cup mamayag 1 pm sa JCSGO Gym sa Quezon City.

Sa unang laro sa ganap na 11 am ay maghaharap ang Tanduay Light at AMA University Titans na kapwa naghahangad na makabawi sa nakaraang kabiguan.

Ang Fresh Fighters, na nagkampeon sa nakaraang Aspirants Cup, ay hiniya ng Jumbo Plastic Linoleum, 64-61 sa kanilang unang laro noong nakaraang Lunes.

Halatang ramdam ng Fresh Fighters ang pagkawala ng mga San Beda players na sina Ola Adeogun, Baser Amer at Art dela Cruz na hindi na pinayagang maglaro sa torneo dahil naghahanda na ang Red Lions para sa darating na NCAA tournament.

Bukod dito ay hindi rin nila kasama ang beteranong si Garvo Lanete na may knee injury. Nalimita rin sa iisang puntos si Aspirants Cup Most Valuable Player Bobby Ray Parks na nagbabalik buhat sa shoulder injury.

Subalit nakapagbigay pa rin ng magandang laban ang Fresh Fighters na dumikit, 62-61 sa basket ni Scottie Thompson. Sineguro nga lang ni Jaym Eguilos ang panalo para sa Giants sa pamamagitan ng dalawang free throws sa huling 6.6 segundo.

Bukod kay Thompson na nagtala ng 17 puntos, tanging si Chris Newsome ang gumawa ng double figures para sa Hapee Toothpaste nang magdagdag siya ng 12.

Ang Liver Marin ni coach Rodney Santos ay nasa ibaba ng standing matapos makalasap ng dalawang sunod na kabiguan. Natalo sila sa AMA University Titans, 89-81 sa opening game ng torneo. Nalasap nila ang ikalawang kabiguan nang tambakan sila ng KeraMix Mixers, 89-71.