Broadcaster/politician sa Sorsogon niratrat

LEGAZPI CITY – Masusing iniimbestigahan ng pulisya ang insidente ng pagpapaulan ng bala sa bahay ng isang politiko at radio broadcaster sa Sorsogon.

Salaysay ni Sorsogon First District Board Member Roland Añonuevo, isa ring broadcaster ng Padaba FM, nanonood siya ng telebisyon sa loob ng kanyang bahay nang makarinig nang sunod-sunod na putok sa labas.

Dahil dito, agad lumabas ang opisyal upang tingnan ang pinagmulan ng putok ngunit wala siyang nakitang tao.

Gayonman, nakarinig siya nang humarurot na motorsiklo na maaaring siyang sinakyan ng mga suspek.

Pagkaraan ay nakita ni Añonuevo ang dalawang tama ng bala sa kanyang sasakyan na naka-park sa garahe.

Walang napaulat na nasugatan sa insidente.