Pnoy inabswelto nina Drilon at Coloma

HINDI puwedeng panagutin si Pangulong Benigno Aquino III sa pagkamatay ng Fallen 44 sa Mamasapano, Maguindanao, base sa doktrinang “command responsibility.”

Sinabi ni Communications Secretary Herminio Coloma Jr.,  sang-ayon ang Palasyo sa pahayag ni Senate President Franklin Drilon na batay sa Roman Statute, “command responsibility will apply if the superior, knowing his subordinate will commit a crime, fails to stop the commission of the crime, or knowing that his subordinates committed a crime, fails to punish them.”

Giit ni Coloma, malinaw na ang pakay ng operasyon ng PNP-SAF (Philippine National Police-Special Action Force) ay hindi krimen kundi upang magpatupad ng batas.

Nauna nang inihayag ni Senator Miriam Defensor-Santiago na puwedeng panagutin si Aquino sa International Criminal Court dahil sa palpak na operasyon sa Mamasapano na ang target ay dalawang “high-value international terrorists.”

Sinabi ni Senator Teofisto Guingona III, posibleng imbitahan si Aquino para alamin ang kanyang nalalaman sa insidente.

Katuwiran ni Coloma, naipaliwanag na ni Pangulong Aquino ang kanyang panig sa SAF operation, kinausap na rin ang mga nasugatan at hiniling sa kanila na isulat ang mga naaalala nilang detalye.

Rose Novenario