5-anyos pinatay sa asin

ni Tracy Cabrera

NAGSIMULA kamakailan ang hindi kapani-paniwala’t nakalulungkot na kaso ng murder na dahan-dahang pinatay ng isang ina ang kanyang 5-taon-gulang anak sa pamamagitan ng asin at idinokumento pa ang unti-unti pagkamatay ng bata sa social media.

Kinasuhan si Lacey Spears, 27, ng Scottsville, Kentucky, na nagpresinta ng online sa kanyang sarili bilang debotong ina, ng ‘depraved murder’ at ‘manslaughter’ sa pagkamatay ng kanyang anak na si Garnett-Paul Spears may isang taon na ang nakalipas.

“Intensiyonal na pinakakain niya ang kanyang supling ng asin sa toxic levels,” pahayag ng prosecutor na si Doreen Lloyd sa arraignment ng Spears.

Tumaas ang sodium levels ng anak ni Spears nang walang medical na paliwanag hanggang mamaga ang kanyang utak at nakaranas ng kombulsiyon na humantong sa pagkamatay nito. Pinaniniwalaang ang kanyang single mother, na kasama niya sa hospital room sa Westchester Medical Center, ang siyang nagbigay sa kanya ng asin sa pamamagitan ng feeding tube.

Habang ginagawa ito, binibigyan din ng update ni Spears ang kanyang mga follower sa 28 online posting sa huling 11 araw ng buhay ng biktima, hanggang sa bawian ng buhay, “Garnett the great journeyed onward today at 10:20 a.m.”

“My Sweet Angel Is In The Hospital For The 23rd Time,” tweet pa ni Spears noong Nobyembre 9, 2009.

Sa rulings ng korte, ang mga mensahe ni Spears sa Facebook, Twitter at MySpace ay tinukoy na mahalaga at maaaring ipresinta bilang ebidensya, punto ni acting state Supreme Court Justice Robert Neary.