HATAW! D'yaryo ng Bayan hatawtabloid.com
BINAWIAN ng buhay at natangayan ng P100,000 cash ang isang negosyante sa Roxas Boulevard, nitong Miyerkoles ng umaga.
Bagama’t naisugod ay binawian din ng buhay sa Ospital ng Maynila ang biktimang si Honrado Hernandez, 47, may-ari ng car rental business at isang maliit na restaurant.
Ayon sa maybahay ng biktima na si Thelma, galing sa banko ang kanyang mister at nag-withdraw na ibabayad sana sa gasolinahan para sa kanilang negosyong car rental.
Patawid ng service road ng Roxas Boulevard, tapat ng CCP, si Hernandez nang bigla na lamang lapitan ng isang lalaki at pinagbabaril.
Sunod na hinablot ng suspek ang bag ng biktima na may lamang tablet, cellphone at perang aabot sa P100,000.
Ayon sa testigo sa insidente, may backup na naka-angkas sa motorsiklo ang suspek.
Hinihinalang tatlo ang bilang ng mga suspek sa krimen na pawang naka-motorsiklo nang tumalilis.
Jaja Garcia
