Fast food manager nagbaril sa ulo

CEBU CITY – Patay na nang madatnan sa loob ng kanilang bahay sa isang subdivision sa Brgy. Dumlog, lungsod ng Talisay, Cebu ang isang manager ng kilalang fast food chain kamakalawa.

Kinilala ang biktimang si John Basallo, 35, may asawa, at residente sa nasabing lugar.

Sa imbestigasyon ng homicide section ng Talisay City Police Office, ipinagtaka ng asawa ng biktima kung bakit nakasara ang kanilang gate at napakadilim ng kanilang bahay nang siya ay dumating galing sa trabaho kaya kinabahan siya.

Ayon sa asawa ng biktima na si Leizel Basallo, hindi niya mawari ang kanyang kaba kaya agad siyang pumasok sa kanilang bahay.

Tumambad sa kanya ang katawan ng biktimang duguan at may hawak na .38 caliber revolver.

Sinasabing may tama ng bala sa ulo ang biktima na siyang dahilan ng agaran niyang pagkamatay.

Nabatid na depresyon sa trabaho ang sanhi nang pagpapakamatay ng biktima.