HATAW! D'yaryo ng Bayan hatawtabloid.com
INIREKOMENDA ng Department of Justice (DoJ) ang pagsasampa ng kaso sa 14 miyembro ng Tau Gamma Phi Fraternity ng De La Salle-College of Saint Benilde (DLS-CSB) chapter bunsod ng pagkamatay sa hazing ng estudyanteng si Guillo Cesar Servando noong Hunyo 28.
Sa 24-pahinang resolusyon na may petsang Nobyembre 5 na isinulat ni Assistant State Prosecutor Stewart Allan Mariano at sinang-ayonan ni Prosecutor General Claro Arellano, nakakita ng probable cause ang panel of prosecutors para kasuhan ng paglabag sa Republic Act No. 8049 o Anti-Hazing Law sina Cody Errol Morales, Daniel Paul Martin Bautista, Kurt Michael Almazan, Esmerson Nathaniel Calupas, Hans Killian Tatlonghari, Eleazar Pablico III, John Kevin Navoa, Vic Angelo Dy, Mark Andrew Ramos, Michael David Castañeda, Justin Francis Reyes, alyas Kiko, alyas Bea, at isang hindi nakilala (Jane Doe).
Habang ipinawalang-sala dahil sa kakulangan nang sapat na ebidensya sina Jemar Pajarito, ang caretaker ng bahay sa Palanan, Makati City na pinangyarihan ng hazing; Luis Solomon Arevalo, Carl Francis Loresca, Steven Jorge Peñano, Ma. Teresa Dayanghirang at Alyssa Federique Valbuena.
Batay sa resolusyon, hindi kabilang ang anim sa mga nanakit kay Servando, at sa kapwa-neophytes na sina John Paul Raval, Lorenze Anthony Agustin at isang menor de edad. Sinabi ni Prosecutor Mariano, inaprobahan na rin nila ang pagiging state witness nina Pajarito at Arevalo.
Leonard Basilio
