2 paslit pinukpok ng martilyo ni tatay

ARESTADO ang isang ama makaraan pukpukin ng martilyo ang kanyang dalawang anak sa Brgy. Industrial Valley Complex sa Marikina.

Kuwento ng ina ng mga biktima na si Ginang Esther, dakong 9 a.m. nitong Martes nang umalis siya ngunit pagbalik niya kinahapunan, nagulat siya sa sumbong ng panganay na si Jun dahil sinaktan sila ng ama.

Bakas sa katawan ni Jun ang mga pasa at sugat makaraan siyang pukpukin ng martilyo ng kanyang amang si Mario. Pati ang 4-anyos niyang kapatid na babae ay pinukpok din ng martilyo sa dibdib.

Ayon kay Jun, matagal na silang sinasaktan ng kanyang ama.

Halos tatlong taon nang tinitiis ng mag-iina ang pananakit ng suspek sa tuwing mag-aaway ang mag-asawa at ang kadalasang dahilan ay selos.

Madalas din aniyang magwala sa kanilang lugar ang suspek, kaya pati mga kapitbahay ay natatakot sa lalaki.

Hindi na nakayanan ni Esther ang ginawa ng kanyang asawa kaya agad siyang nagsumbong sa barangay at mga pulis. Agad dinampot ng mga awtoridad ang suspek at ikinulong.

Nahaharap ang suspek sa kasong paglabag sa Republic Act 7610 o Special Protection of Children Against Child Abuse, Exploitation and Discrimination Act.