PBA lalaro sa MoA sa Pasko

KINOMPIRMA ni PBA Media Bureau Chief Willie Marcial na babalik sa Mall of Asia Arena ang Philippine Cup ngayong araw ng Pasko, Disyembre 25.

Ito’y dahil may Disney on Ice ngayong Kapaskuhan sa Smart Araneta Coliseum.

“OK na ang MOA for Christmas. Inaayos lang kung ano ang schedule namin,” wika ni Marcial. “Malamang, isang game kapag semis. And since Christmas Day falls on a Thursday, aayusin namin with TV5 kung anong oras magsisimula ang laro. Baka 5 o 6 pm.”

Taun-taon ay may laro ang PBA tuwing araw ng Pasko simula pa noong 2002 nang tinalo ng Coca-Cola ang Alaska upang magkampeon sa Philippine Cup.

Sa araw ng Pasko noong isang taon sa MOA, tinalo ng Air21 ang Globalport, 109-103 samantalang pinabagsak ng Barangay Ginebra San Miguel ang Petron Blaze (ngayon ay San Miguel Beer), 97-83.

(James Ty III)