Daniel, nahiyang sa US kaya tumaba

 

ni Dominic Rea

NAG-ENJOY si Daniel Padilla sa halos isang buwan niyang pamamalagi abroad. Umalis siya noong October 9 papuntang Amerika para sa ASAP Live sa LA at tinuhog ang apat na shows and appearances sa Canada at bumalik ng ‘Pinas nitong November 6.

Marami ang nakapansin sa biglaang pagtaba ni Daniel at bumagay pa ngang lalo ang paglaki ng kanyang pisngi at katawan.

Ayon kay Daniel, iba raw talaga ang pagkain doon at sistema ng buhay kompara rito sa atin. Nag-enjoy talaga si Daniel dahil nabisita niya ang naglalakihan at kilalang tourist spots sa Amerika at Canada.

Isang prebilehiyo ito para kay Daniel na hindi niya sukat akalaing mapupuntahan niya sa kanyang murang edad. Kaagad naman balik trabaho ang sikat na Teen King pagdating ng ‘Pinas.

“Back to normal lang. Ganoon lang naman. Trabaho. Tapos kapag may time magpahinga ay pahinga, rito lang din naman sa bahay ang pahingahan ko, billiards, basketball, ganoon lang Tito Dom, alam mo naman yan eh,” bungisngis pa nitong tsika sa akin nang bisitahin ko kamakailan.

Guys, ngayong November 15 po ay nandiyan po kami sa Island Cove, Cavite para naman sa isang show ni Daniel. Kitakits tayo guys ha!

Samantala, tinanggap din nina Daniel at Karla Estrada sa Quezon Memorial Circle ang parangal at rekognasyon bilang mga natatanging bayani or unsung heroes of Yolanda sa pamumuno ni Carlo Maceda sa imbitasyon ni Mell Navarro dahil sa ipinakitang pagtulong ng mag-ina sa kanilang kababayan sa Tacloban noong nakaraang taon.