Kim, mami-miss ang tawa ni Coco

ni Rommel Placente

NAGTAPOS na ang top-rating drama series ng ABS-CBN na Ikaw Lamang nina Coco Martin at Kim Chiu. Aminado si Kim na may lungkot siyang naramdaman nang magtapos ang kanilang serye.

“Nakakalungkot din kasi mag-iisang taon kaming magkakasama sa ‘Ikaw Lamang’, tapos nagkahiwala-hiwalay na kami. Mami-miss namin ‘yung bonding. At saka sa ‘Ikaw Lamang’, ang dami kong nakatrabahong artista, 34 kaming lahat. Sobrang honored ako na nakatrabaho ko silang lahat sa isang show,” sabi ni Kim nang makausap namin ito.

Ano ang mami-miss niya sa bonding nila ni Coco?

“Siguro ang mami-miss ko kay Coco ‘ yung kapag nag-umpisa na siyang tumawa, hindi siya titigil sa loob ng 10 minuto. Tawa lang siya ng tawa. Kami rin sa set, tawa na rin kami ng tawa. Ayun, sobrang nakatutuwa siya,” ang natatawang sagot ni Kim.

Kamakailan ay naging kontrobersiyal si Coco dahil sa ginawa niyang pagrama sa Bench Fashion Show na may hila-hila siya ritong isang modelong babae na nakakadena. Hindi ‘yun nagustuhan ng ibang tao. Ginawa raw parang isang aso ‘yung modelo. Pati na ang Gabriela, ang grupong nagmamalasakit sa mga kababaihan ay nag-react din tungkol dito.

Paano niya ipinakita ang pagsuporta sa leading man sa Ikaw Lamang?

“Lahat kami nag-uusap, parang wala naman siyang kasalanan. Artista kami, siyempre gagawin namin kung ano ang ipinagagawa sa amin.

“Kami gagawin namin ang ipinagawa ninyo kasi ‘yun ang program ninyo. Hindi namin alam na iba ang makikita ng Gabriela. Iba pala ang tingin nila. ‘Yung model nga, ayos naman sa kanya.

“Sa amin bilang artista, sa ikagaganda ng show, gagawin namin. Ganoon ‘yung tema ng show, animalistic.”