3 paslit inararo ng trak tepok

TATLONG paslit ang namatay nang araruhin ng humahagibis na trak habang naglalaro sa tabing-kalsada sa Caloocan City kamakalawa ng hapon.

Namatay habang nilalapatan ng lunas sa Dr. Jose N. Rodriguez Hospital sanhi ng matinding pinsala sa ulo at katawan sina Jabez Marlo Gestupan, 9; Jerwin Mendoza, 7 at Adrian Boyson, 6, pawang residente sa Brgy. 176, Bagong Silang.

Agad dinakip ang suspek na si Randy Molo, 30, residente sa Quickway St., Barangay Pajo, Meycauayan, Bulacan.

Sa ulat ni PO3 Michael Calora, may hawak ng kaso, naganap ang insidente dakong 3:00 p.m., sa kahabaan ng Phase 10B, Block 5, Brgy. 176, Bagong Silang.

Nawiwili sa paglalaro ang mga biktima malapit sa nakaparadang jeep (UVD-879) sa naturang lugar, nang biglang sudsurin ng Fuso Canter (REN-265) na minamaneho ni Molo.

ni Rommel Sales