HATAW! D'yaryo ng Bayan hatawtabloid.com
NANAWAGAN sa pamunuan ng Pasay City Police ang reporter ng Philippine News Agency (PNA) para sa mabilisan paghuli sa anim kabataang lalaki na sumaksak at tumangay ng kanyang cellphone sa harap ng kanilang bahay sa Pasay City kamakalawa.
Nasa mabuti nang kalagayan ang reporter na si Ferdinand “Bong” Patinio, 43, makaraan masaksak sa hita at braso ng isa sa anim kabataang lalaki at kinuha ang kanyang i-Phone 5s na nagkakahalaga ng P43,000.
Sa mensaheng ipinadala sa text ni Patinio, humihingi siya sa pamunuan ng Pasay City Police ng tulong sa hepe ng pulisya na si S/Supt. Melchor Reyes para sa agarang paghuli sa mga suspek dahil makapambibiktima pa sila ng iba.
Sa ulat ng pulisya, nangyari ang insidente dakong 12:30 a.m. nitong Linggo sa harap ng bahay ni Patinio sa 619 EDSA, panulukan ng Cabrera St., sa nasabing lungsod. (J. GARCIA)
