HATAW! D'yaryo ng Bayan hatawtabloid.com
TEPOK ang isang factory worker at sugatan ang isa pa sa pagsalpok sa poste ng koryente ng sinasakyang motorsiklo nang iwasan ang asong gala sa Naic, Cavite kamakalawa.
Bagok ang ulo makaraan humampas sa semento kaya agad namatay ang biktimang si Doven Quimson, 28, ng Brgy. Palangue 3, Naic, Cavite, habang isinugod sa San Lorenzo Hospital ang sugatang angkas na si Arjay Vasquez, 24, kapwa factory worker, ng nabanggit ding lugar.
Sa salaysay ni Vasquez sa pulisya, dakong 3 a.m., minamaneho ni Quimson ang motorsiklo habang siya ay angkas ngunit pagsapit sa Naic-Indang Road, Brgy. Halang ay biglang tumawid ang isang aso.
Nagulat si Quimson kaya kinabig ang motorsiklo ngunit nawalan nang kontrol at sumalpok sa poste.
Sa lakas ng bangga, tumilapon ang mga biktima.
(BETH JULIAN)
