HATAW! D'yaryo ng Bayan hatawtabloid.com
KORONADAL CITY – Patay ang isang barangay chairman at dalawang iba pa sa ambush sa Sitio Linangkat, Brgy. Pandan, South Upi, Maguindanao kamakalawa.
Kinilala ang mga biktimang sina Brgy. Chairman Perfecto Travilla, 49; Jason Mundo, 16, at Alex Tumbaga, 29, pawang mga residente ng Sitio Bahar, Brgy. Pandan sa bayan ng South Upi.
Sa inisyal na imbestigasyon ng South Upi -PNP, sakay ng Wrangler jeep (LED 419) mula sa Sitio Bahar ang mga biktima at pauwi na sana sa kanilang lugar nang pagdating sa Sitio Linangkat ay biglang pinaulanan ng bala ng mga armado na naging dahilan ng kanilang pagkamatay.
Sugatan din sa insidente ang iba pang mga kasamahan ng barangay chairman na isinugod sa ospital sa Cotabato City.
Sa ngayon, nagpapatuloy pa ang imbestigasyon ng mga awtoridad hinggil sa naturang ambush.
