Konsehala na dating Miss Earth sugatan sa ambush

SUGATAN ang dating Miss Earth-Philippines na konsehala ng Hagonoy, Bulacan, makaraan pagbabarilin ng hindi nakilalang suspek kamakalawa ng gabi sa Paombong, Bulacan.

Sa impormasyon mula kay Senior Supt. Joel Orduna,  Bulacan Police Director,  kinilala ang biktimang si Konsehal Francis Dianne Cervantes, 32, residente ng Brgy. Mercado.

Naganap ang bigong pagpatay kay Cervantes dakong 7:30 p.m. sa bayan ng Paombong.

Sinasabing nakaangkas sa motorskilo ang biktima at patungo sa bahay ng kanyang pamilya sa Brgy. San Isidro 2, Paombong, nang pagbabarilin ng riding-in-tandem.

Agad tumakas ang mga suspek makaraan ang pamamaril, habang dinala ng mga residente si Cervantes sa isang ospital sa Paombong bago inilipat sa Bulacan Medical Center sa Malolos City.

Mula sa Malolos City, dinala na si Cervantes sa isang pagamutan sa Metro Manila.

Nasa ikatlong sunod na termino na bilang konsehal ng Hagonoy si Cervantes na itinanghal na Miss Earth Philippines-Fire noong 2006.

(DAISY MEDINA)