Binata sugatan sa buy-bust

ISINUGOD  sa Ospital ng Maynila ang 23-anyos lalaki, matapos manlaban  at mabaril  ng mga tauhan ng Manila Police District-PS 5, sa isinagawang buy-bust operation, sa San Andres Bukid, Maynila,  kamakalawa ng gabi.

Inoobserbahan sa nasabing ospital  ang biktimang si Meise Megan Cosca, alyas “Boy”, ng 1254 Gonzalo St.,San Andres, sanhi ng tama ng bala sa puwit.

Sa ulat ng pulisya, nagsagawa ng buy bust operation ang mga tauhan ng Station Anti Illegal  Drugs-Special  Operations Task Group (SAID-STOG) MPD-PS5  sa pangunguna  ni SPOs1 Jeffrey delos Reyes at William Cristobal at nakuhanan umano ng 4  plastic sachet na hinihinalang shabu  si Cosca.

Nakuhaan din ng 9-pulgadang patalim ang binata at marked money.

Sa panayam sa kaanak ng binata, bigla na lang umanong pumasok sa kanilang bahay ang pitong kalalakihan at tila may hinahanap.

Bunsod nito, nag-hysterical ang ina ng biktima  kaya maging siya ay muntik na rin arestuhin kung saan pinagduduro pa siya sa mukha  at pilit na tinataniman ng droga sa bulsa ng kaniyang short ngunit pumalag siya kaya  ang kaniyang cellphone  ang kinuha.

Kasunod nito, pinosasan ang kaniyang anak patalikod  at biglang binaril sa puwit.

Dinala sa nasabing ospital  ang binata  habang dumiretso sa MPD headquarters ang pamilya ng biktima upang magreklamo sa tanggapan ng MPD-General Assignment Section (MPD-GAS).

(leonard basilio)