HATAW! D'yaryo ng Bayan hatawtabloid.com
INIHAIN na sa Department of Justice ng National Bureau of Investigation (NBI) ang patong-patong na kaso laban kay Cedric Lee at pitong iba pa, kaugnay sa sa pambubugbog sa actor/TV host Vhong Navarro, nitong Miyerkoles ng gabi sa isang condo unit sa Taguig City.
Isinampa ang mga kasong serious illegal detention (walang piyansa), serious physical injuries , grave threat, grave coercion, illegal arrest at blackmail, laban kina Cedric Lee, Bernice Lee, Deniece Cornejo, Zimmer Raz, Ferdinand Guerrero, isang alyas Mike at dalawang ‘di pa natutukoy ang mga pangalan.
Sa pagsisiyasat ng NBI, nagkaroon ng sabwatan ang mga inaakusahan batay sa mga ebindensyang hawak ng nasabing ahensiya ng pamahalaan.
Bitbit ng NBI ang sworn statement ng aktor, statement ng mga guwardya at ng pulis na gumawa ng blotter entry, kopya ng blotter mula sa Southern Police District, testimonya ni Rommel dela Cruz, driver ni Vhong , testimonya ng mga kaibgan at ang footage ng CCTV ng gabing mangyari ang insidente.
SEGURIDAD NI VHONG SAGOT NG DOJ
TINIYAK ni Justice Secretary Leila de Lima na handa nilang aksyonan ang magiging apela ng kampo ni TV host/actor Ferdinand “Vhong” Navarro na humingi ng security protection kasunod ng pagbabanta ng isang lalaking nais pumasok sa kanilang bahay sa Quezon City kamakailan.
Ayon kay De Lima, hinihintay na lamang ng ahensya ang pormal na hiling ng kampo ni Navarro upang maikonsidera kung kinakailangan isailalim sa security protection ang kanyang pamilya.
Una rito, dumulog si Atty. Dennis Manalo, abogado ni Navarro kasama ng iba pang counsel ng aktor, sa DoJ upang humingi ng tulong para sa pamilya ng aktor.
Nanawagan din ang kampo ni Vhong na maging ang patas ang imbestigasyon sa kaso.
Nakasentro ang imbestigasyon ng NBI sa insidente ng pambubugbog kay Navarro at maging ang paratang na attempted rape ng kampo ni Deniece Cornejo.
“Kung mangyayari ulit uulitin ko ulit”
LEE HAHARAPIN ASUNTO NG NBI
Handa si Cedric Lee na harapin ang anomang kasong isinampa sa kanya ni Ferdinand “Vhong” Navarro.
Ito’y matapos ibunyag ng aktor na siya ay bbinubgbog ng grupo ni Lee sa Forbeswood Heights Condominium sa Taguig City noong Enero 22.
Inihayag ni Lee, hindi siya tatakbo o lalabas sa bansa dahil sa reklamo laban sa kanya.
“Hindi po ako tatakbo. Kung kailan akong ma-convict, so be it,” ani Lee.
Anim na kaso ang isinampa ni Navarro laban sa kanya at mga kasamahang sangkot sa insidente.
Wala umanong pinagsisisihan ang negosyanteng si Lee sa kanyang ginawa kay Navarro.
“Hindi ko po pinagsisisihan kung mangyari ulit, uulitin ko ulit ‘yan.”
Giit ni Lee, ipinagtanggol lamang niya ang ginawang panggahasa ni Navarro kay Deniece Cornejo.
“Lumalabas na kami pa ang masama.”
SPD UMAMIN SA MALING PROSESO
UMAMIN ang hepe ng Southern Police District (SPD) na may pagkukulang ang mga tauhan sa paghawak sa kaso ng Kapamilya actor-TV host na si Vhong Navarro.
Sa panayam, sinabi ni SPD Director Chief Supt. Jose Erwin Villacorte na maituturing na lapses o pagkukulang ang hindi pagpilit ng mga pulis sa celebrity na magpa-medical.
“Doon po sa pangyayaring dapat ipina-medical natin, sa palagay ko meron nga (lapses)… Dapat nag-insist sila, hindi lang ini-offer na dalhin siya sa ospital.”
Sa hiwalay na panayam ng TV Patrol, ikinatwiran ni PO3 Dalmacio Lumiuan ng District Investigation and Detective Management (DIDM) Division, na roon nagpa-blotter si Navarro at kampo nina Deniece Cornejo at Cedric Lee, mismong ang aktor ang tumanggi.
“Nakita namin [‘yung] itsura ng tao, we exerted effort to convince him to seek medical treatment. However, katawan niya ‘yun e. Siya nagsabi na, ‘Kaya ko pa naman, Sir’ kaya hindi namin siya mapilit na… dalhin sa ospital.”
Maging si Cornejo anya na nag-akusang ni-rape ni Navarro ay tumangging magpa-medical.
“Sabi ko, ‘Kung ipa-file n’yo ‘yung complaint, kailangan ipa-medical ko kayo lahat kasi ie-endorse ko kayo sa Women’s, sila po ang kukuha ng statement.’’
“Di na po, Sir… ‘di kami magpa-file ng case kay Navarro,’” sabi niya. ‘Gusto ko lang i-put into record itong ginawa niya sa kin.’”
Ipinaubaya na ng Philippine National Police (PNP) kay Villacorte ang pag-imbestiga sa ginawa ng kanyang mga tauhan.
ni leonard basilio
