Trolley driver patay utol sugatan sa resbak
PATAY ang isang lalaki habang sugatan ang kanyang kapatid makaraang saksakin ng kapwa nila trolley driver kamakalawa ng hapon sa Pandacan, Maynila.
Kinilala ang namatay na si Rolando Santos Jr., 27, habang sugatan si Robertson, 29, kapwa residente ng #2611 K, Jesus St., Pandacan, nilalapatan ng lunas sa Sta. Ana Hospital.
Mabilis na nakatakas ang suspek na si Angelito Arquero, alyas Dragon, 38, residente rin sa #2611 K, Jesus St., Pandacan.
Sa imbestigasyon ni SPO2 Jonathan Bautista ng Manila Police District-Homicide Section, dakong 7:50 a.m. nang maganap ang insidente sa may riles ng tren habang namamasada ng trolley ang tatlo sa Tower Bless, Pandacan.
Napag-alaman dati nang may alitan ang suspek at si Rolando. Nang magkita ang dalawa ay hinabol ng saksak ng suspek ang biktima ngunit nakatakbo si Rolando.
Gayunman, nang balikan ng biktima ang kanyang trolley ay inabangan siya ng suspek at pinagsasaksak.
Nagtangkang umawat ang kapatid ng biktima na si Robertson ngunit maging siya ay inundayan din ng saksak ng suspek.
(LEONARD BASILIO)
